Simone Inguanez

ritratt li ma stajtx ma nibgħatlekx

għalik għax ma stajtx inġiblek il-baħar

il-baħar – arah

jokrob bl-uġigħ tax-xemx nieżla

jistabat ma’ l-ilsna tal-blat

– u jitħabat

hu u jnaqqas in-nifs

għalija għax sogħob bija

kuljum insaqqi l-ġnien tiegħi

stivat f’ringiela ta’ qsari żgħar

– fuq il-ħogor uħud ta’ vera uħud le

waħda waħda

kuljum niftaħ it-tieqa

u noħroġ għonqi nittawwal

niċċekkja l-wied għadux hemm

kuljum ninżel it-taraġ imħaffer

u nħalli ħsieb fuq kull waħda

– u nerġa’ lura niġborhom

u nibqa’ tielgħa sal-bejt

u nerġa’ niftaħ u nħares – ’l isfel u ’l bogħod

u nonfoħ ’il ġewwa bil-mod

u nżid ftit ftit u naħseb narmihx

u nkompli nżid

– u naħseb baqax

din l-art

din l-art li trabbejt fiha mutraba – mutraba sew

taħt iż-żrar taħt il-konkos tindifen

bir-ruħ u l-ġisem tinhereż

wied wied jaqa’ s-skiet

sa ma tiksru r-riħa

li taqsmu

nannuwi jagħżaq nannuwi jsaqqi

nannuwi f’soddtu jistaqsi

telax il-ful telax l-għeneb

fetħux isbaħ id-dalji

dix-xitwa dir-riħa t’għelieqi

maqfula sod f’imnifsejh nieżla miegħu

– iż-żebbuġ – il-basal ta’ ħdejn in-naħal

il-bużbież – u t-tina x-xiħa– u l-ħawħa –

jaqsmuh

is-skiet jaqsmuh

meqruda wied wied

tinhereż ġisem u ruħ irmied

taħt iż-żrar taħt il-konkos tindifen

mutraba – mutraba u midfuna l-art li trabbejt fiha

il-fjur li trid tifga

il-fjur li trid tifga ħanini tirfsux

għax ifuħ – ifuħ aktar

– u ma nafx jifilħux imnifsejk

vincent

għal van gogh u oħrajn

xtaqt

żammejtek ftit – ftit – u ġibtek

haw’ tilgħaq raxx xatt il-baħar

tbaħbaħ għajnejk tbaħbaħ ruħek

fl-ikħal fil-blu akwamarin turkważ

trasparenti – mifrux – toqtor l-għejja

u t-toqol u qalbek sewda

sa jerġa’ jibdielek u tibqa’ togħxa

– bix-xita tfaqqa’ u x-xiħa traqqa’

d-djar żgħar fil-ħaxix u l-qamħ u l-peprin

u d-dwal imżellġa – ġo l-ilma u l-ħamrija

u d-dellijiet tal-fanali jpittru l-uċuħ fuq il-ħajt –

xtaqt

xtaqt ġibtek – u bqajt inżommok

– ħa tfieq

nibqa’

jien mnej’ jien ma nafx

fix-xtut tiegħek – imma – noqgħod

ma jweġġagħni xej’ l-isfar tagħhom mar-riħ

jew l-aħdar iħaxwex f’widinti minn taħt l-ilsien

jew il-melħ iċafċaf jitbandal

mnej’ jien ma nafx

jekk tħallini – imma – nibqa’

xita fuq laħmi / xewqa

għalik għax għalaqtli

ħa tinżel ix-xita fuq laħmi – iftaħli

ħa jaħbat ma’ driegħi r-riħ – jiksini

jisqini gliegel fietla fil-miġbaħ – middni

għerja fix-xagħri filgħodu

jiġborha safja ġismi il-qiegħa

u nħalltu u naqsmu flimkien

dal-ġisem jiflaħ u jrid

min qallek drawwa iebsa qatt ma taqtagħha?

mitt darba qtajtha did-drawwa